Edicions jorn :: literatura occitana contemporanea

Occitan  |  Francés

Rotland Pécout : Mastrabelè

1999. Amb una revirada francesa de l'autor

Mastrabele, de Rotland Pécout AGOTAT

Mastrabelè es lo nom d’una vila foceana arroïnada dins las còlas de la mar de Berra. D’ara enlà, es tanben lo títol e lo tèma d’un ensems poëtic de dètz-e-uèch tablèus, longament meditat, escrich entre 1978 e 1998 per Rotland Pécout.

Escrivan de las facietas multiplas, adereng e tot en un còp poèta, traductor, dramaturg, jornalista, critic literari, romancèr, ensagista, Rotland Pécout prepausa pas que per moments pro rars, en occitan, d’òbras amplas, recampant o sintetizant la vastitud e la diversitat de sa quista d’escritura. Après los dos volums de pròsa de Portulan e, dins un autre registre, lo raconte de L’Envòl de la Tartana, Mastrabalè pòt aparéisser coma un tèxt que los imatges de l’escrivan se fixan e ont los racontes se rejonhon : ni soma, nimai recapitulacion, mas puslèu condensacion quasiment mitica d’un encaminament.

Dins Mastrabelè, la votz del poèta, invocant los ancians abitants del luòc, sasís las vibracions, a l’encòp ultimas e primièras, de la vida, a dicha que se’n presentas las scènas essencialas. A la mesura de la mòrt e de la vida, los dètz-e-uèch tablèus d’aquela epopèa de l’ome tot al plaser de sas fins darrièras se dona coma una exploracion sensuala e ça que la rasonada de l’aventura primièra que cava sas envejas de sets de de fams dins cadun d’entre nosautres. Mai d’un còp, Pécout s’es dich mogut per un desir d’Orient, qui sa tòca seriá, al dintre lo pus ensebelit de nosautres coma al pus luènh de las originas nòstras, de renosar amb aquela part indispensable d’èstre que sola nos garda umans. Ni cort ni costièr, Mastrabelè, a l’encòp cant, raconte e dramaturgia d’aquel desir, n’es tanben la faula luminosa e grèva, la flamba de mots e de ritmes sens relambi en recaliu.

Mastrabelè, de Rotland Pécout
Amb una revirada francesa de l'autor
Format : 14 x 22,5  /  80 pages  /  ISBN : 2-905213-24-8
Preitz : 13,72 €

  A prepaus d'aqueste siti           © Jorn 2006 / 2011 - Totes dreches resèrvats - Concepcion grafica e realizacion : Georges Souche