Edicions jorn :: literatura occitana contemporanea

Occitan  |  Français

Max Allier
D'amor e de contèsta

Antologia poëtica. 2003. Amb una revirada francesa de l'autor

d'amor e de contesta, poemes de Max Allier Dins aquel ultim recuèlh de Max Allier, son reünits, en mai de qualques poèmas ja publicats dins los recuèlhs precedents, de tèxtes inedits, escriches mai que mai après Lo Plag. Es estat compasat a la convidacion de Jorn pel quite poèta, qualques setmanas abans sa mòrt. Per el, èra aquí una soma poëtica, recampant sos inedits mas tanben prepausant un itinerari a travèrs los diferents moments de son òbra.

La màger part dels 44 poèmas son datas, del mai ancian, lo sonet De tant de jorns, que dobrís lo recuèlh (1932, l’an dels vint ans de l’autor), fins al pus recent, Per J.O.L., escrich en 1998. Sens seguir un òrdre estrictament cronologic, tant aimèt Max Allier mesclar tèmas e datas, per rendre sensibla, a travèrs la seguida imprevesibla e per part aleatòria dels poèmas, l’unitat e la rica diversitat de la vida ela. Son vèrb poëtic se desplega en largas estròfas esposant, çò mai sovent, lo ritme de l’alexandrin e evocant, e mai dins los moments de confidéncia, la solemnitat sacrada de l’imne o de l’anatèma.

Max Allier, aicí coma dins lo demai de son òbra poëtica, es testimòni de la necessitat imperativa la paraula e de sa fisança dins sos poders, en l’occurréncia l’occitan de Lengadòc, qu’es tanben lo de Max Roqueta. Lenga d’anciana memòria, nòbla a l’auçada del mesprètz qu’a pogut patir, sola capabla de dire, a son vejaire, aquel espaci de mar, d’estanhs, de vinhas e de garrigas que monta, coma en amfiteatre, fins a las montanhas santas de la Cevena, que s’i enrasigan totas las resisténcias e totes los remembres.

D'amor e de contèsta, de Max Allier
Antologia poëtica, amb una revirada francesa de l'autor
Format : 14 x 22,5  /  136 paginas  /  ISBN : 2-905213-25-6
Pretz : 20 €

  A prepaus d'aqueste siti           © Jorn 2006 / 2011 - Totes dreches resèrvats - Concepcion grafica e realizacion : Georges Souche